(ភ្នំពេញ)៖ មានប្រសាសន៍ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់ទីស្តីការគណៈរដ្ឋមន្ត្រី នារសៀលថ្ងៃទី២៣ ខែមីនា ឆ្នាំ២០២៦ ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានណែនាំដល់ថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់ នៃទីស្ដីការគណៈរដ្ឋមន្ត្រី ឱ្យផ្លាស់ប្តូរឥរិយាបថក្នុងការបំពេញការងារ ដោយឈរលើគោលការណ៍ 3H (Head, Heart, Hand) សំដៅបង្កើនផលិតភាព គុណភាព និងសមិទ្ធកម្មការងារ ព្រោះថាបច្ចុប្បន្នប្រទេសយើងកំពុងស្ថិតក្នុងស្ថានភាពអាសន្ននៃការគំរាមកំហែងដល់អត្ថិភាពជាតិ។ ដូចនេះ យើងមិនអាចធ្វើការដូចទម្លាប់ធម្មតាពីមុនមកបានទេ ពោលគឺយើងទាំងអស់គ្នាត្រូវមានការប្តេជ្ញាចិត្តខ្ពស់ ចេះឈឺឆ្អាល ចែករំលែក និងចេះហ៊ានលះបង់ឱ្យលើសពីធម្មតា ដើម្បីប្រទេសជាតិ និងត្រូវបន្តខិតខំបំពេញការងារតាមតួនាទីនិងភារកិច្ចរបស់ខ្លួន ដោយប្រកាន់ខ្ជាប់នូវវិន័យការងារ ដោយរួមទាំងការគោរពម៉ោងពេលធ្វើការងារ និងរបបសុំច្បាប់ឈប់សម្រាកជាដើម។
ឯកឧត្ដមឧបនាយករដ្ឋមន្រ្តីប្រចាំការ វង្សី វិស្សុត បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់ នៃអង្គភាពក្រោមឱវាទ ដែលបានខិតខំយកអស់កម្លាំងកាយ ចិត្ត និងប្រាជ្ញាស្មារតី ក្នុងការបំពេញមុខងារនិងភារកិច្ច ដោយសម្រេចបាននូវសមិទ្ធផលលេចធ្លោសំខាន់ៗ ជូនប្រទេសជាតិ និងប្រជាជន ក្នុងរយៈពេលកន្លងមក។ ឯកឧត្តម ក៏បានថ្លែងអំណរគុណចំពោះការចូលរួមស្តាប់របាយការណ៍ សមិទ្ធផលការងារ បញ្ហាប្រឈម ព្រមទាំងបញ្ហាពាក់ព័ន្ធនឹងការបំពេញមុខងារនិងបេសកកម្មរបស់ទីស្តីការគណៈរដ្ឋមន្ត្រី ពិសេសលើមូលបទនិងប្រធានបទនៃសន្និបាត ព្រមទាំងការចូលរួមជាទស្សនៈ និងធាតុចូលសំខាន់ៗ ក្នុងក្របខ័ណ្ឌនៃអភិបាលកិច្ចនិងការកែទម្រង់ស្ថាប័ន គោលការណ៍ក្នុងការកសាងស្ថាប័ន និងការអភិវឌ្ឍធនធានមនុស្ស។
ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានស្នើគ្រប់តំណាងក្រសួង ស្ថាប័ន ឱ្យបង្កើនកិច្ចសហការកាន់តែសកម្ម លើការអនុវត្តមុខងារស្នូល និងមុខងារសម្របសម្រួលរបស់ទីស្ដីការគណៈរដ្ឋមន្រ្តី ពិសេសលើការងារកែទម្រង់ច្បាប់ និងការតាក់តែងសេចក្ដីព្រាងច្បាប់និងលិខិតបទដ្ឋានគតិយុត្តផ្សេងទៀត ព្រមទាំងការពង្រឹងគុណភាពនៃការអនុវត្ត RIA ដើម្បីបង្កើនគុណភាព ប្រសិទ្ធភាព និងសមិទ្ធកម្មការងារ សំដៅចូលរួមអនុវត្តប្រកបដោយប្រសិទ្ធភាពនូវកម្មវិធីនយោបាយ យុទ្ធសាស្ត្រ កម្មវិធីគោលនយោបាយអាទិភាព និងវិធានការគន្លឹះរបស់រាជរដ្ឋាភិបាល។ ទន្ទឹមនេះ ឯកឧត្តម ក៏បានលើកទឹកចិត្តថ្នាក់ដឹកនាំនិងមន្ត្រីរាជការទាំងអស់ សិក្សា ស្រាវជ្រាវ ស្វែងយល់ពីប្រវត្តិសាស្រ្ត វប្បធម៌ និងអរិយធម៌របស់ខ្មែរយើង និងដកពិសោធន៍ពីមេរៀនអតីតកាល បណ្ដុះគំនិតអភិវឌ្ឍខ្លួនឯង បន្តរៀនសូត្រ បង្កើនសមត្ថភាព ចំណេះដឹង និងជំនាញឱ្យបានពូកែ រួមគ្នាជាធ្លុងមួយ ទាំងកងទ័ព មន្ត្រីរាជការ ប្រជាជន ទាំងរាជរដ្ឋាភិបាល ជាកម្លាំងតែមួយ ក្នុងស្មារតីសាមគ្គីភាព ឯកភាពជាតិ និងមានវិន័យ ក្រោមការដឹកនាំដ៏ត្រឹមត្រូវរបស់សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត ដើម្បីកសាងនិងអភិវឌ្ឍប្រទេសជាតិ ឱ្យបានរឹងមាំ និងរីកចម្រើន ប្រកបដោយភាពធន់ ចីរភាព និងនិរន្តរភាព។
សូមជម្រាបជូនថា សន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់ទីស្តីការគណៈរដ្ឋមន្ត្រី បានប្រព្រឹត្តទៅរយៈពេលពេញមួយថ្ងៃ ដោយបានពិភាក្សាលើមូលបទចំនួន៤ ទី១. ការជំរុញប្រសិទ្ធភាពតាក់តែងច្បាប់និងលិខិតបទដ្ឋានគតិយុត្ត និងការសម្របសម្រួលកិច្ចប្រជុំពាក់ព័ន្ធនៅទីស្ដីការគណៈរដ្ឋមន្រ្តី ទី២. ចំណាត់ការរបស់រាជរដ្ឋាភិបាលចំពោះសង្រ្គាមកម្ពុជា-ថៃ និងវិធានការគាំទ្រសម្រាប់ជនរងគ្រោះនិងជនភៀសសឹក ទី៣. ការប្រារព្ធខួបទី១០០ឆ្នាំ នៃការបង្កើតបណ្ណសារដ្ឋានជាតិនៃកម្ពុជា ផ្សារភ្ជាប់ជាមួយនឹងកិច្ចប្រជុំកំពូលហ្វ្រង់កូហ្វូនីលើកទី២០ និងផែនការយុទ្ធសាស្រ្តធ្វើទំនើបកម្មបណ្ណសារជាតិសម្រាប់រយៈពេល១៥ឆ្នាំ(២០២៦-២០៤០) ទី៤. កម្មវិធីកែទម្រង់ ការគ្រប់គ្រងហិរញ្ញវត្ថុសាធារណៈរបស់ទីស្ដីការគណៈរដ្ឋមន្រ្តី និងបានបង្ហាញនូវវឌ្ឍនភាពនិងលទ្ធផលការងាររបស់អគ្គនាយកដ្ឋានទាំង១០ ព្រមទាំងក្រុមប្រឹក្សា អាជ្ញាធរ គណៈកម្មាធិការ និងអង្គភាពផ្សេងទៀតក្រោមឱវាទទីស្ដីការគណៈរដ្ឋមន្ត្រី។
ក្នុងឆ្នាំ២០២៥ ទីស្តីការគណៈរដ្ឋមន្រ្តីសម្រេចបាននូវសមិទ្ធផលធំៗជាច្រើន ដូចជា ការដាក់ចេញនូវក្របខ័ណ្ឌយុទ្ធសាស្ត្រនៃកម្មវិធីកែទម្រង់ច្បាប់របស់រាជរដ្ឋាភិបាល, របាយការណ៍តាមដាន ត្រួតពិនិត្យ និងវាយតម្លៃការអនុវត្តយុទ្ធសាស្ត្របញ្ចកោណ ដំណាក់កាលទី១ ប្រចាំឆ្នាំ២០២៤ និងប្រចាំឆមាសទី១ ឆ្នាំ២០២៥, គោលការណ៍ណែនាំស្ដីពីការគ្រប់គ្រងហិរញ្ញវត្ថុសាធារណៈសម្រាប់ទីស្ដីការគណៈរដ្ឋមន្ត្រី, ការដាក់ឱ្យដំណើរការឡើងវិញនូវគម្រោង RIA, ការដាក់ចេញនូវគោលការណ៍ណែនាំផ្ទៃក្នុង និងយន្តការក្រុមការងារចំពោះកិច្ច ដើម្បីពង្រឹងប្រសិទ្ធភាពការងារ, ការធ្វើទំនើបកម្មប្រព័ន្ធឌីជីថល, ការអនុវត្តនូវប្រព័ន្ធលើកទឹកចិត្តផ្ទៃក្នុងដោយផ្អែកលើសមិទ្ធកម្មការងារ, ការផ្ដល់គ្រឿងឥស្សរិយយស, ការងាររាជកិច្ច និងបណ្ណសារដ្ឋានជាតិ, ការអភិវឌ្ឍធនធានមនុស្ស, ការកែទម្រង់រចនាសម្ព័ន្ធស្ថាប័នជាមួយនឹងការរៀបចំក្បាលម៉ាស៊ីនដឹកនាំអង្គភាព និងការកែលម្អបរិយាកាសនិងទីកន្លែងធ្វើការងារ ព្រមទាំងសមិទ្ធផលការងារ ក្នុងភារកិច្ចសម្របសម្រួលការងារប្រចាំថ្ងៃរបស់គណៈរដ្ឋមន្ត្រី ដូចជាលើកិច្ចការរៀបចំកិច្ចប្រជុំពេញអង្គគណៈរដ្ឋមន្ត្រី កិច្ចប្រជុំអន្តរក្រសួង កិច្ចប្រជុំអន្តរក្រសួងចង្អៀត កិច្ចប្រជុំជំនាញបច្ចេកទេស ព្រមទាំងការសិក្សាស្រាវជ្រាវ ពិនិត្យ និងផ្តល់យោបល់លើសំណើឯកសាររបស់ក្រសួង ស្ថាប័ន និងសេចក្ដីព្រាងលិខិតបទដ្ឋានគតិយុត្ត និងការរៀបចំសេចក្ដីជូនដំណឹងស្ដីពីការសម្រេចរបស់រាជរដ្ឋាភិបាលជាដើម។
អង្គសន្និបាតក៏បានដាក់ចេញនូវទិសដៅការងារសំខាន់ៗ រួមមាន៖ ១). បន្តពង្រឹងគុណភាពនិងប្រសិទ្ធភាពលើការគាំទ្រដល់កិច្ចដំណើរការ និងការរៀបចំកិច្ចប្រជុំពេញអង្គគណៈរដ្ឋមន្រ្តី, ការពិនិត្យនិងផ្តល់យោបល់លើសំណើឬឯកសារ សេចក្តីព្រាងច្បាប់និងលិខិតបទដ្ឋានគតិយុត្ត គោលនយោបាយ និងយុទ្ធសាស្ត្រ និងការវិភាគស្ថានភាពសេដ្ឋកិច្ច សង្គមកិច្ច និងវប្បធម៌ ២). បន្តការអនុវត្តគម្រោងវាយតម្លៃលើលទ្ធផលប៉ះពាល់នៃលិខិតបទដ្ឋានគតិយុត្ត-RIA ៣). បន្តជំរុញការងារកែទម្រង់ច្បាប់ ពិសេសជំរុញបញ្ចប់ការរៀបចំសេចក្តីព្រាង មគ្គុទេ្ទសក៍សិល្ប៍សាស្រ្តនីតិកម្ម ៤). បន្តរៀបចំផែនការអភិវឌ្ឍន៍ស្ថាប័ន និងការពិនិត្យឡើងវិញការវិភាគមុខងាររបស់ស្ថាប័ន និងអង្គភាពចំណុះ ៥). បន្តអភិវឌ្ឍសមត្ថភាពថ្នាក់ដឹកនាំនិងមន្រ្តី ៦). បន្តពង្រឹងការងារទំនាក់ទំនងជាមួយរដ្ឋសភានិងព្រឹទ្ធសភា ៧). ធ្វើទំនើបកម្មប្រព័ន្ធគ្រប់គ្រងទិន្នន័យបណ្ណសារនិងរាជកិច្ច ៨). បន្តពង្រឹងមុខងារសម្របសម្រួល និងមុខងារគាំទ្រ ពិសេសជំរុញការងារបរិវត្តកម្មឌីជីថល និងការគ្រប់គ្រងហិរញ្ញវត្ថុសាធារណៈ ៩). ដឹកនាំការតាមដាន ត្រួតពិនិត្យ និងវាយតម្លៃយុទ្ធសាស្រ្ដបញ្ចកោណ ដំណាក់កាលទី១ ១០). បន្តរៀបចំសេចក្តីព្រាងរបាយការណ៍សកម្មភាពការងាររបស់រាជរដ្ឋាភិបាល និងរបាយការណ៍សំខាន់ៗពាក់ព័ន្ធផ្សេងទៀត ១១). រៀបចំការធ្វើជំរឿនផ្ទៃក្នុងស្ថាប័ននិងតាមអង្គភាពចំណុះ ១២). បន្តសិក្សា ស្រាវជ្រាវតាមបែបវិទ្យាសាស្រ្ត ស្ថានការណ៍ជុំវិញពិភពលោក និងគម្រោងនានា ព្រមទាំងការអភិរក្សនិងអភិវឌ្ឍភាសានិងអក្សរសាស្ត្រជាតិ ១៣). បន្តអនុវត្តមុខងារសេសសល់និងការងារកេរដំណែលរបស់ អ.វ.ត.ក. ១៤). បន្តសម្របសម្រួល តាមដាន និងត្រួតពិនិត្យការងារវិស័យសកម្មភាពមីន ១៥). បន្តសម្របសម្រួលការងារគ្រប់គ្រងគ្រោះមហន្តរាយ ១៦). បន្តធ្វើបច្ចុប្បន្នភាពសៀវភៅផែនការជាតិប្រឆាំងភេរវកម្ម និងបញ្ជ្រាបការយល់ដឹងពីវិធីបង្ការ ទប់ស្កាត់អំពើភេរវកម្ម ១៧). បន្តបង្កើនប្រសិទ្ធភាពនៃការសម្របសម្រួលការងារអាជ្ញាធរ ក្រុមប្រឹក្សា គណៈកម្មាធិការ និងអង្គភាពនានា ស្ថិតនៅក្រោមសមត្ថកិច្ចរបស់ទីស្តីការគណៈរដ្ឋមន្រ្តី និង១៩). បន្តអភិវឌ្ឍសុសវែរស្របតាម «កម្មវិធីគម្រោងអាទិភាពបរិវត្តកម្មឌីជីថលរបស់ទីស្តីការគណៈរដ្ឋមន្ត្រី»។
